ဒေါ်အောင်ဆန်းစုကြည်ကို အမိန့်မချဘဲ ဒီဇင်ဘာလ ၆ရက်နေ့ကိုပြန်ချိန်း

ဒေါ်​အောင်ဆန်းစုကြည်ကို စွဲဆိုထားသည့် အမှုများထဲမှ ပုဒ်မ ၅၀၅(ခ)အမှုနှင့် သဘာဝ​ဘေးအမှုတို့ကို ယနေ့ (၃၀.၁၁.၂၀၂၁)ရုံးချိန်းတွင် အမိန့်ချမှတ်ရန် စီစဥ်ထား​သော်လည်း ​နောက်ရုံးချိန်းတွင်သာ ချမှတ်ရန် ​ရွှေ့ဆိုင်းလိုက်​ကြောင်း သိရသည်။
အဆိုပါ အမှုများကို အမိန့်ချရန် ဒီဇင်ဘာ ၆ ရက်​နေ့သို့ ​ရွှေ့ဆိုင်းချိန်းဆိုလိုက်ခြင်းဖြစ်သည်။
နိုင်ငံ​တော်အတိုင်ပင်ခံပုဂ္ဂိုလ် ​ဒေါ်​အောင်ဆန်းစုကြည်အ​နေဖြင့် လက်ရှိတွင် အမှု​ပေါင်း ၁၁မှုဖြင့် တရားရင်ဆိုင်​နေရပြီး ရွေးကောက်ပွဲဆိုင်ရာ ပုဒ်မများဖြင့်လည်း ထပ်တိုးတရားစွဲခံထားရသည်။
အဆိုပါအမှုများထဲမှ ပုဒ်မ ၅၀၅(ခ)မှာ ​ဒေါ်​အောင်ဆန်းစုကြည်၊ သမ္မတ ဦးဝင်းမြင့်နှင့် ​နေပြည်​တော်​ကောင်စီဥက္ကဌ ​ဒေါက်တာမျိုး​အောင်တို့ ၃ဦးကို ပူးတွဲစွဲဆိုထားခြင်းဖြစ်သည်။
၎င်းတို့ ၃ဦးမှာ ​ဖေ​ဖော်ဝါရီ ၁ ရက်​နေ့ကတည်းက ဖမ်းဆီးထိန်းသိမ်းခံထားရပြီး အဆိုပါ ၅၀၅(ခ)အမှုမှာ NLD CECက ဖေ​ဖော်ဝါရီ ၁ ရက်​နေ့​နောက်ပိုင်း ထုတ်ပြန်ထားသည့်ထုတ်ပြန်ချက် ၂ စောင်နှင့်ပတ်သတ်ပြီး စွဲဆိုထားခြင်းဖြစ်ကြောင်း သိရသည်။
ထို့အပြင် ယ​နေ့ အမိန့်ချရန် စီစဥ်ထားသည့် သဘာဝ​ဘေးအမှုမှာ ၂၀၂၀ခုနှစ် စက်တင်ဘာ ၁၉ရက်နေ့က နေပြည်တော်တွင် ပြုလုပ်ခဲ့သည့် NLDပါတီအတွက် မဲဆွယ်ကားကမ်ပိန်းကို အိမ်ရှေ့ထွက်ပြီး လက်ပြနှုတ်ဆက်ခဲ့သည့်အတွက်ဟုဆိုကာ ​နိုင်ငံ​တော်အတိုင်ပင်ခံပုဂ္ဂိုလ် ဒေါ်​အောင်ဆန်းစုကြည်နှင့် သမ္မတ ဦးဝင်းမြင့်ကို ပူးတွဲစွဲဆိုထားသည့်အမှုဖြစ်သည်။
ယ​နေ့ ရုံးချိန်းတွင် ​ဒေါ်​အောင်ဆန်းစုကြည်တဦးတည်းကို စွဲဆိုထားသည့် သဘာဝ​ဘေးအမှုကိုလည်း စစ်​ဆေးခဲ့ပြီး အဆိုပါ အမှုနှင့် ပတ်သတ်၍ ဒေါက်တာဇော်မြင့်မောင်သည် ခရီးထွက်ပြီးနေပြည်တော်သို့လာနိုင်သည့် အခြေအနေရှိပြီး လာရာက်သက်သေခံလိုကြောင်း ၄င်း၏ရှေ့နေထံမှသိရကြောင်း စွပ်စွဲခံရသူ၏​ရှေ့​​နေက တရားရုံးတွင် တင်ပြခဲ့​ကြောင်း သိရသည်။
ထို့​ကြောင့် ရုံးမှဆင့်စာထပ်မံထုတ်ပေးရန်နှင့် ဆင့်စာကိုဒေါက်တာဇော်မြင့်​မောင် လက်ထဲ တိုက်ရိုက်ချပေးရန်လျှောက်ထားရာ တရားသူကြီးက ယင်းကိစ္စကို ဒီဇင်ဘာ ၆ ရက်​နေ့တွင် အမိန့်ချရန် သတ်မှတ်လိုက်​ကြောင်း သိရသည်။
ယခင်ပုံဟောင်း